सीरेया तिन्ही घरूणा तां

जे भाड़े ने परसूणा तां।
कितणा की दुध दूणा तां।।

खास परोणा जाहलू ओणा।
न्यौड़े ने सलूणा तां।।

नुंऐं दिक्खिया झुंड कुआड़ी।
है केई किछ गलूणा तां।।

बड़ा जे बणना लुगड़मार।
बछाणे च मतरूणा तां।।

दो पखाने, चौर उल्टियां।
अंग-अंग सतरूणा तां।।

वक्त पेया पखलें मुलखें।
अपणा कुण पछणूणा तां।।

धरती पर रैहणा सिक्ख।
गास्से ने मलहूणा तां।।

गांदा- गांदा बाबा बोलें।
सीरेया तिन्ही घरूणा तां।।